Noyabrın 6-sı Azərbaycanda televiziya və radio işçilərinin peşə bayramı – Azərbaycan Televiziyası və Radiosu Günü kimi qeyd olunur. Bu əlamətdar gün ölkəmizin informasiya məkanının formalaşmasında, milli mətbuat tarixinin inkişafında və ictimai fikrin təşəkkülündə mühüm xidmətləri olan media nümayəndələrinin əməyinə verilən dəyərin ifadəsidir.
1926-cı il noyabrın 6-da Azərbaycan radiosunun fəaliyyətə başlaması ilə ölkəmizin media tarixində yeni bir səhifə açılıb. Həmin gündən etibarən radio Azərbaycan xalqının həyatında mühüm yer tutaraq cəmiyyətin maarifləndirilməsinə, bilgiləndirilməsinə, milli-mənəvi dəyərlərin qorunub saxlanmasına və təbliğinə xidmət edib. Radio uzun illər insanların ən yaxın informasiya mənbələrindən biri olmaqla yanaşı, ölkədə baş verən mühüm hadisələrin, tarixi məqamların və ictimai proseslərin canlı salnaməsinə çevrilib. Azərbaycan televiziyasının yaranması isə bu sahənin inkişafında yeni mərhələnin başlanğıcı olub. Bakı Televiziya Studiyası ilk dəfə 1956-cı il fevralın 14-də efirə çıxıb. İlk yayım günündə tamaşaçılar ekranlarda tanınmış aktrisa, mərhum sənətkar Nəcibə Məlikovanı görüblər. Onun efirdə səsləndirdiyi “Göstərir Bakı” sözləri Azərbaycan televiziya tarixinin yaddaşlara həkk olunan ilk ifadəsinə çevrilib. Həmin gün tamaşaçılara “Bəxtiyar” bədii filmi də təqdim olunub. Beləliklə, noyabrın 6-sı təkcə radio yayımının deyil, bütövlükdə Azərbaycan teleradiosunun yaranma və inkişaf tarixini özündə birləşdirən əlamətdar gün kimi qeyd olunmağa başlayıb. Ötən onilliklər ərzində Azərbaycan televiziyası və radiosu ölkənin ictimai-siyasi, mədəni və sosial həyatının işıqlandırılmasında mühüm rol oynayıb. Tarixi hadisələr, dövlətçilik ənənələri, milli bayramlar, mədəniyyət və incəsənət nümunələri, elm və təhsil sahəsindəki yeniliklər məhz televiziya və radio vasitəsilə geniş auditoriyaya çatdırılıb. Televiziya və radio yalnız informasiya ötürən vasitə deyil, həm də cəmiyyətlə zaman arasında körpü yaradan, ictimai düşüncəyə təsir göstərən, insanların dünyagörüşünün formalaşmasına töhfə verən mühüm ictimai institutlardır. Bu sahədə çalışan jurnalistlərin, aparıcıların, redaktorların, rejissorların, operatorların, montajçıların, səs rejissorlarının, texniki heyətin və digər mütəxəssislərin əməyi hər bir uğurlu yayımın arxasında dayanır. 6 Noyabr – Azərbaycan Televiziyası və Radiosu Günü münasibətilə Qafqaz TV-nin yaradıcı qrupu adından televiziya və radio sahəsində çalışan bütün həmkarlarımızı ürəkdən təbrik edirik! Arzu edirik ki, qələminiz hər zaman həqiqətə, sözünüz cəmiyyətin maariflənməsinə, əməyiniz isə xalqımıza və dövlətimizə xidmət etsin. Qoy efirlərimiz daim aydın, səsimiz eşidilən, sözümüz dəyərli, xəbərlərimiz etibarlı olsun! Əziz həmkarlar peşə bayramımız mübarək!