ŞƏHİD ANALARI VƏ QAZİLƏR QUBADA

Fevralın 7-də respublikamızın müxtəlif bölgələrindən olan şəhid anaları və qazilərdən ibarət bir qrup Quba şəhərinə səfər edib. Səfər Quba Şəhidlər Xiyabanından başlayıb. Burada şəhidlərin xatirəsi ehtiramla yad olunub. Hər məzar bir ömrün, hər ad bir taleyin izi kimi xatırlanıb. 20 Yanvar Şəhid Ailələrinin Hüquqlarının Təmin Olunması İctimai Birliyinin Qaradağ rayonu üzrə sədri, şəhid Xurşud Əsgərovun qardaşı Oruc Əsgərli deyir ki, bu günə qədər yüzlərlə şəhid ailə üzvlərinin Qubaya səfərini təşkil edib. Ziyarət boyunca anaların baxışlarında səbr, qazilərin addımlarında isə sarsılmazlıq hiss olunub. Şəhidlər xiyabanı bir daha xatırladıb ki, bu torpaq unudanlara deyil, xatırlayanlara əmanətdir. Səfər Quba Memorial Soyqırımı Kompleksində davam edir. Burada zaman sanki dayanır. Torpağın altından çıxan həqiqətlər, daşlara həkk olunmuş səssizlik insanı susmağa məcbur edir. Bu məkan təkcə tarixi faktların deyil, xalqın yaddaşına yazılmış ağrının və müqavimətin canlı şahididir. Ziyarət edən hər kəs üçün burası keçmişlə üz-üzə qalmaq, unudulmayanı bir daha xatırlamaq yerinə çevrilir. Qubaya edilən bu səfər təkcə bir marşrutun adı deyil. Bu yol müalicə və reabilitasiya üçün atılan addımlarla yanaşı, yaddaşa, tarixə və şəhidlərin ruhuna sədaqətin ifadəsidir. Qazilər və şəhid anaları Qubada olduqları müddətdə həm sağlamlıqlarını bərpa edir, həm də onları ayaqda saxlayan mənəvi güclə baş-başa qalırlar. Bu səfər bir neçə günün yox, bir xalqın yaddaşının davamıdır.